ታህሳስ 17/2016 ዓ.ም (ትምህርት ሚኒስቴር) በትምህርት ዘርፍ የሚስተዋሉ ችግሮችን ለመቅረፍ ኤጁኬሽን ዴቨሎፕመንት ትረስት (EDT) ሲሰራቸው የነበሩ ስራዎችን ማስቀጠል በሚቻልበት ሁኔታ ላይ ምክክር ተካሂዷል።

በመድረኩ የተገኙት በትምህርት ሚኒስቴር የመምህራንና ትምህርት አመራር ልማት መሪ ስራ አስፈፃሚ ዶ/ር ሙሉቀን ንጋቱ ባለፉት አራት ዓመታት Education Development Trust (EDT) በርካታ ስራዎችን ሲሰራ እንደነበር አንስተዋል።

በተለይም የትምህርት ቤት አመራር ስልጠና እንዲሁም የትምህርት መረጃ ስርዓትን ማሻሻል ላይ የሠራቸው ስራዎች አሁን በትምህርት ሚኒስቴር ቁልፍ ጉዳዮች ተደርገው ተለይተዋል ብለዋል።

በዚህም የማስተማርና የትምህርት ቤት አካባቢ የየተሟላ እውቀትና ልምድ ያላቸው የትምህርት ቤት አመራሮችን ለመፍጠር በትኩረት እየተሠራ ይገኛልም ብለዋል።

ዛሬ በትምህርት ስርዓቱ ላይ ትኩረት ሰጥተን ካልተረባረብን ነገ የሚፈለገውን ለውጥ ማምጣት አንችልም ያሉት ስራ አስፈፃሚው ያለውን ሀብት በአግባቡ በመጠቀም በትምህርት ዘርፍ ለውጥ ማምጣት ይገባልም ነው ያሉት።

የታርጌት ካንትሪ ዳይሬክተር ዶ/ር አብዱ ዘለቀ በበኩላቸው ፕሮጀክቱ ባለፉት አራት ዓመታት የመንግስትን ትልቁን የትኩረት አቅጣጫ ወስዶ ሲሰራ እንደነበር አንስተው በተለይም ትምህርት ቤትን መሠረት ያደረገ ሀገር አቀፍ የትምህርት ቤት አመራሮች ሥልጠና፣ ሴቶች በትምህርት ሥርዓቱ ወደ አመራር የሚመጡበትን እንዲሁም የትምህርት መረጃ ሥርዓትን ማሻሻል ላይ ትኩረት ሠጥቶ ሲሰራ እንደነበር አንስተዋል።

በመሆኑም ሀገራዊ የትምህርት ቤት አመራሮች ሥልጠና ፖሊሲ ማዕቀፍና ስትራቴጂዎች መኖርን እንደ መልካም አጋጣሚ በመውሰድ ትምህርት ሚኒስቴርና ክልሎች በትኩረት ሊሠሩ ይገባል ብለዋል።

በመጨረሻም የትምህርት ሚኒስቴር ስትራቴጂክ ጉዳዮች ስራ አስፈፃሚ አቶ መዝገቡ ቢያዝን Education Development Trust(EDT) እየሠራቸው የነበሩ ስራዎችን በትምህርት ሥርዓቱ ለማስቀጠል በሁሉም ፕሮግራሞች በማስገባት እየተሠራ መሆኑን አንስተው ሁሉም የድርሻውን እንዲወጣ መልዕክት አስተላልፈዋል።

Education Development Trust የያዘው ፕሮጀክት በጥር ወር መጨረሻ ይጠናቀቃልም ተብሏል።